Li in Canoas-RS i ze 14 ani che un grupo de persone, in medo a fàbriche, mercadi grandi, in sità dove se laora dea matina a sera, e co riva note bisogna sararse su rento casa par via dei malani, ste persone le vive sempre in filò, parché el telèfono, i compleano, le vìsite, el giutarse te le malatie e necessità... ze tuto roba sagrada. E na volta al ano, le fa na festa con pi de mila persone, par farghe veder a tuti come ze bel viver sempre in filò.

I ze tuti dissendenti de Taliani, che i porta vanti la stòria dei noni, del filò, del giutarse uno con l’altro, de parlar come i noni, del mantegner la so independensa come persone, come fameia e come cultura, come ga insegnà i noni da 125 ani. Ze na vita, na stòrtia e na cultura che lori i ga fato su par noaltri. Questa vita e cultura se le vive, le altre se pol impararle.

Ste fameie le parla coi dóvani, le ghe conta le stòria del tempo dea migrassion, del tempo che el magnar zera la pi grande richessa, rason parché i nostri i ze vegnesti del Itàlia, sensa sprosiàrsela. Laorar, giutarse, magnar, bever e pregar come i veci, eco cosa le fa ste fameie de Canoas.

De dove semo vegnesti? Come semo vegnesti? Parché semo vegnesti? Cosa ghemo fato fin oncó? Come semo, cosa femo, cosa pensemo, come schersemo e preghemo noantri oncó? Eco le domande che se fa sta gente de Canoas.

Ma chi zeli sti taliani de ieri, de oncó e anca, se pol dir, de doman, parché i ze drio consegnarghe ai fioi tuta la so bela stòria. I ze le fameia de Osório e Zilma Biazus; Hugo e Irene dal Farra; Luiz Augusto e Rejane Chies; Francisco e Lourdes Dequi; Eduvar e Gládis Scolari; Waldemiro e Alair Agustini; Roque e Rosa Minella; Marcos e Miraci Ronchetti; Altair e Karen Stello; Ademar e Dalila Togni; Cláudio e Bárbara Marconato; Irno e Elza Bordignon; Fernando e Jussara Casagrande; Rêmulo e Lourdes Togni.

Tuti i ani i porta a la comunità la so vita, la so stòria, el so parlar, el so pregar, el so dugar e schersar, sempre con magnari bìvite e canto, atraverso la Note Taliana. In quatòrdese ani i ga fato quatòrdese note taliane.

E i risultadi i ze drio farse veder. Sempre pi persone le parla, le stùdia, le porta vanti la nostra cultura.

Mapi, brasoni, standardi, bandiere, veste tìpiche, mùsiche, magnari, el giornal de le culture Correio Riograndense ...tuto, tuto quel che se pol dir talian, fato su qua tel Rio Grande do Sul e tel Brasile i se fa presenti.

Ste fameie le pol dir con ciaresa de idee: Finimo de farsu la nostra Itàlia qua, dopo ndemo veder come i Taliani che i è restadi in Itàlia i contìnua far su la so Itàlia del delà del mar.

Se quatòrdese ani de laoro i ghesse bio solo e apena el risultato-sorpresa, sucedesto tea XIV Note Taliana, el saria suficiente. Savio cosa ze sucedesto?

No stè piander, che ve la conto. I tosati, fìlii e nipoti... i se ga fato presenti là par meso dea festa, e i ga apresentà un omàgio registrà ai so genitori, con le so stesse parole, con le stòrie e i canti che i ga sentio, con sta bela conclusion:

– Pupà e mame, noni e none, bisnoni e bisnone... volemo farve saver che noantri ve volemo ben, che no ve desmenteghemo mai pi, che gnanca una sola de le vostre parole la dassaremo perder. El vostro afeto, e la vostra stòria, el vostro magnar, el vostro pregar, el vostro cantar, e po tuto quanto, lo volemo pi nostro che vostro, parché noantri gavemo impì de valtri, parché ve gavemo valtri e gavemo la cultura che valtri me gavì dà insieme al late materno.

– Gràssie, parché me dè tuti i giorni la gràssia de volerve ben!

Canoas, con la Note Taliana, la insegna cosa vol dir stòria e cultura, come forma de vita.

Porto Alegre, 2 de outubro de 2001

Rovílio Costa