Idee in testa, forsa tei brassi, tanto amor nel cor, tuto in forma de coraio e aventura, eco Nanetto che varda el mondo che Dio ga fato par i omeni, e el vol  sénterlo e cognósserlo tuto, in tuti i tempi, posti, popoli e culture. Nanetto, se fusse darghe el sopranome de profeta, el saria un profeta roverso, parché, come mostra Nanetto nel  Mondo, invense de profetisar el doman, el profetisa el ieri, par viver el oncó. Parché scaldar le rece col doman? – Dasselo rivar, dopo vedremo cosa far. El geri toca conquistarlo, el oncó toca farlo, el doman tocá spetarlo, cosi pensa Nanetto nel Mondo. Mi son mi, ti te si ti, lu el ze lu, e tuti insieme semo nantri, tuti diversi, tuti nanetti a la so maniera par darghe al mondo el color e la fàcia mia, tua, de elo, de ela e nostra. Se lu el ze el Nanetto nel Mondo, nantri insieme semo i Nanetti dei Mondo. Se’l mondo fusse na gamba de fior, nantri, i nanetti, sarissimo i fiori. Porto Alegre, 25 de janeiro de 2006. Frei Rovílio Costa