De la parola vien la vita, de la vita vien la stòria, de la stòria vien la cultura.

Te la Tore de Babelo, la gente la volea ndar su, fin dove gera el Signor, par véder come la zera là, par vèr le stesse cose del Signor. E el Signor i ga parai indrio, come a dirghe:

– Sio gnanca mati, volì vegner qua, far quel che mi fao, e credé de catarme qua, e par vegner qua gavì fato sta tore cossì granda. No savì mia che, co valtri rivè qua, mi te un solo pensamento, te na frassion de secondo, vao do, dove geri valtri.

Bisogna capir che cadauno el deve star tel so posto.

Lora, i òmeni, vegnendo indrio de sta tore de Babelo, i se ga catà diferenti uno de l’altro, cadauno con le so idee in testa, e i ga scominsià voler dirghe ai altri come che cada uno el zera. Ma vegnea fora parole tute diferente, parché tuti semo diferenti uno de l’altro, e tute importante anca, parché le gera la maniera de cadauno mostrar la so vita, contar la so stòria.

El Signore el ga fato el mondo solo con la forsa dele so parole:

– Che sia fata la tera! Che sia fato el sole! Che sia fata la luna! Che sia fati i pessi, i osèi, tuto quanto...

E in fine, dopo tuto de bon e bel che’l ga fato, el se ga ritratà lu stesso come creator, quando el ga dito, tuto in pròsia:

– Desso femo el omo e la dona, e li femo con la nostra fàcia, e luri i comandarà tuto, i catarà fora, de in meso tute le cose, el drito e el roverso, e così i potrà farse felici lori e far felice el mondo.

Ma la fàcia de Dio la porta rento tute le belesse, tute le simpatie de ómeni e done de tuto el tempo. Par questo che a cadauno el ghe ga dà a parlar, farse capir par far capir la so vita.

Le lìngue diverse, lora, le vol dir modi de vita diversa, modi de esser diversi e che tuto vien dea parola.

El pupa e la mama i se ga dito con parole che i se volea ben, lora i se ga maridai, e i me ga fato fioi sui. De la so parola semo nati noaltri. Lora semo la parola de Dio e la parola dei nostri pupà e mame.

Dio creator el ze la grande parola che ga fato saltar fora la vita de tuto e de tuti.

Gesù el ze la parola de Dio fata natura umana, la parola che ga fato saltar fora la salvassion par tuti.

I nostri, co i ze vegnesti qua par far un novo mondo, prima i se ga parlà, e ze stà na parola viva, dcisiva, forte, coraiosa, piena de vita, che ga fato saltar fora tuto quel che semo e gavemo el di de oncó in Mèrica.

Lora, de oncó in vanti, parlemo qua con le parole dei noni, che ze le parole che le ga fato la nostra vita, parché e parole dei altri se pol impararle e capirle, ma le parole dei nostri noni e none, pupà e mame le fa viver a cadauno la vita de la so stessa stòria, come ùnica, vegnesta fora dea boca de Dio e dei nostri genitori.

Se dassemo de parlar come ga parlà i nostri noni durante sti sento e vinti sei ani, li desmenteghemo par sempre, come se no i fusse nostri noni, li dassemo tel silénsio eterno e, co se cataremo con lori in paradiso, no se capiremo pi. Lora imparar tute le lìngue ze importante, ma el pi importante ze no smentegar la lìngua che me ga fato vegner al mondo, che ze a lìngua dei nostri antenati.

Quei che i vol mandar stòrie scrite te la so maniera de parlar, la maniera de parlar de so noni, sia in polaco, tedesco, talian, portoghese... basta che sia la maniera come parlava e cosa parlava i noni, che i le mande a questo indirisso: