Quando se parla de gemei se parla de fradei spessiai, diferenti dei altri. Lora farse gemei a pararia na cosa strània, vense la ze na cosa tanto pi importante che la definission biològica, parché la ze na definission rassional e lìbera. Fa parte dea genètica dea mente e dea libertà.

El giorno 18 de sto mese de giugno del 2001, el governatore del Rio Grande do Sul, Olívio Dutra, el sotoscrive el gemelaio del Rio Grande do Sul, el stato pi meridionale del Brasile, con la Regione Véneto. Gemelaio tra un Stato e na Regione. Na cosa inèdita, nova, che segnala, anca, na nova maniera de esser e de far.

Lora, suito, ghe domando, sia al Rio Grande do Sul, sia a la Regione Véneto, che cosa vol dir sto gemelaio? Cosa se pol spetar de sto gemelaio?

Come na persona che nasse, bisogna che la impare un mùcio de cose fin vegner esser na persona granda, adata a viver el mondo, così anca el gemelaio che nasse, ghe tocarà sviluparse sempre depì, méterse a laorar, a far qualche cosa diferente de quelo che ze stato fato fin desso.

Par quel che se sa e se cognosse, i gemelai tra comuni del Brasile e del Itàlia, che i ze raquanti, i ze pi o meno na corona de intensioni, de scambi, de incontri, de viagi, de consegne de distinsioni, de costrussion de qualche monumento, de scambi de corsi, scambi comersiali, industriali, culturali e religiosi..., ma, desso, se trata de na cosa pi granda, pi profonda, che deve tradur, in perfession, come du gemei univitelini, la someliansa tra loro. La pi grande someliansa che ghe podrà esser tea polìtica, tel economia, tel comèrsio, tel turismo, tea religion, tea cultura... de na maniera generale e definitiva.

Nò come ùltima e definitiva parola, parché semo du gemei ancora drio imparar a parlar del pupà e dela mama, con le so diferente maniere de parlar, ma come scomìnsio dea parlata, noantri volemo dirghe al nostro gemel, el Véneto del Itàlia, chi semo noaltri, come el Véneto del Rio Grande do Sul, e cosa spetemo del nostro gemelo, che’l ze da star de l’altra parte de Ocèano.

Bisogna saver, prima de tuto, che semo sempre stai gemei, e gemei univitelini, ma da pìcoli semo stai deslatai de la nostra mama, e slevai da baile de late in posti diferenti, sensa uno saver de l’altro.

Desso, però, se ghemo catà, stemo insieme, e ogni giorno catemo fora nove maniere de viver e de parlar, diferenti gusti de far le cose, na voia santìssima de catarse, de discorer, de far filò, de méterse a tola para star insieme... Comemorar, far festa, pregar, cantar, ricordar i posti, e date de quando se ghemo spartio par poder viver e sopraviver te le diverse parte del mondo.

De na cosa solo semo sicuri: In ogniuno de noantri ghe ze un véneto marangon, imprenditore, industrialista, filòsofo, cristian, artista... E semo medo imbambíi uno con l’altro. No semo pi boni de assar de rimirarse, de catar le diferense, le qualità, le conquiste, le speriense...

E la cosa che volemo far pròpio ze na casa, na casa granda, dove se possa starghe tuti insieme, la region del Véneto e el Stato del Rio Grande do Sul. Che fameiassa, de pi de quìndese milioni de persone, parché véneti e riograndensi faremo na fameia sola: bambini, veci e dóvani... sia nel Véneto del Rio Grande do Sul, sia nel Véneto del Itàlia, ghemo l’incàrico de far, de ste du grande fameie, na sola fameia.

Ma sensa préssia, parché le semense bisogna semenarle, ghe vol la piova par farle vegner su, ghe vol el bon tempo par farle produr... Mainarse! se i nostri i ghe ga messo tanto tempo a far la so prima caseta provisòria e, dopo de tante prove provisòrie, i ga fato na casa un po pi definitiva e sempre, sempre i ze drio far su case... noantri scomissiemo sta nova costrussion che no la se finirà mai, parché come Véneti del Itàlia e Véneti del Rio Grande do Sul, ghemo anca i nostri fioi in tute le altre parte del mondo, e ghemo anca gente de tute le altre parte del mondo insieme con noaltri, e con questi volemo farse Véneti del Mondo e far del mondo Un Altro Véneto.

Lora, noantri, come Véneti del Rio Grande do Sul, coi altri Véneti del Brasile, e con tuta la gente de altre etnie del Rio Grande do Sul, che, tuti insieme, semo la intiera fameia del Rio Grande do Sul, volemo dir a valtri, Véneti del Itàlia, che, par noantri, le saria importanti, par intanto, ste tre cose:

1° Cognósserse;

2° Parlarse fin capirse, e con voia e parole de capirse;

3° Far su na gran costrussion dei Véneti del Itàlia e dei Véneti del Rio Grande do Sul, come base de la costrussion universale, dei Véneti nel Mondo.

1º Lora, partendo del primo punto, noantri scomissiemo par dirve chi semo e cosa femo, come Véneti del Rio Grande do Sul.

El Rio Grande do Sul, atraverso el gemelaio, el ze deventà el Véneto del Brasile, e, come el Véneto del Itàlia el ze un Teritòrio del Itàlia, el Véneto del Rio Grande do Sul, el ze un Territòrio del Brasile. Ma, tanto là, come qua, el nostro pòpolo no’l ze tuto rento el teritòrio. Sia là che qua, semo véneti insieme ai altri. Lora, semo Véneti nel Mondo, parché semo convinti che bisogna far cognosser a tuti la felissità de esser Véneto.

El Véneto del Itàlia e el Véneto del Rio Grande do Sul el ze un teritòrio e un pòpolo, ma no i sarà mai un solo teritòrio par tuto el pòpolo, parché tanti dei nostri fioi, tosi e tose de sta grande fameia, pi granda del teritòrio, i è ndadi a tute le parte del mondo, col incàrico de far Véneto el Mondo.

Lora come Véneti del Rio Grande do Sul e come Véneti del Itàlia volemo far Véneto el Mondo.

Come gemei, ghemo du grande case, che ze i du teritòrii, e du grande fameie che ze i du grandi pòpoli véneti, quei del Véneto del Itàlia e quei del Véneto del Rio Grande do Sul, con fioi e fiole in tute le parte del mondo.

Territòrio e fioi, eco le do grande rissorse nostre, come gemei, fioi che sempre pi semo e saremo véneti del mondo, con la cosciensa de ver un pupà e na mama e de esser fradei. E tuto questo se ciama cosciensa, che deve sviluparse, aprofitando le speriense romai fate, ndando vanti coa procission, parché la ze longa ancora da percorer.

A livelo del cognossimento, bisogna che se palesemo, che se parlemo, che se cognossemo. Lora noantri, come el gemel ciamà Rio Grande do Sul, proemo dir qualche cosa, tel nostro primo incontro come gemei, al nostro gemel che se ciama Véneto del Itàlia.

Varda, caro gemel Véneto del Itàlia, ti te sì stà slevà tel Véneto del Itàlia, là te ghè la to casa, le to piantaion, i to laori, la to cesa, i to libri, la to scola, el to governo, la to cultura e te ghè portà vanti el esser, far, parlar e creder dei nostri noni:

– Mi son el Véneto del Rio Grande do Sul che da pìcolo son ndà via de casa, ma son ndà via co gera tuto compagno de ti:

• un bel bambin e na bela bambina,

• in tuto un bambin e na bambina come ti,

• gnente diferente, tuto quel che semo e come semo vegnesti al mondo,

• el pupà e la mama, soto el òcio de Dio, i ga spartio tuto compagno.

E po te sè che biologicamente èrino uno solo, se ghemo fato due, ghemo fato le nostre fameie e, de noantri due, ze vegnesto fora un gemelasso, che desso ghe ciamemo gemelaio, che ze el Véneto del Itália e el Véneto del Rio Grande do Sul, i due insieme fando el Véneto del Mpondo.

Gehmo desso du cognomi: del Itàlia e del Rio Grande do Sul, e i nostri fioi, co i se marida, i ciaparà un altro nome, che sarà nel mondo. Se ghemo maridai, ghemo fato le nostre fameie, e, desso, dopo 126 ani, se catemo insieme, ghemo na longa stòria da contarse, na longa speriensa da cambiar. Lora mi, che son el Véneto del Rio Grande do Sul, vui parlar con ti, che te sì el Véneto del Itàlia, par ricordarte che tuti due ghemo scoerto che gavemo naltro gemel, che ze el Véneto nel Mondo.

Esser gemel vol dir esser compagno, e vol dir anca esser diferente, parché co se catemo casa tua o casa mia, no magnaremo sempre polenta, o riso coi funghi... Co te vien qua in Rio Grande do Sul, te magnarè anca ti el sorasco, la fagiolada con la farina de maniot... e quando mi vao a casa tua vui magnar el salam, el formai, el prossiuto, le paste e el riso coi funghi, i radici trevigiani, la polenta e lumache... e po de tuto quel che sempre te me scrivi che te ghè casa tua.

Lora, desso te digo qualche cosa de mi, come to gemel, el Véneto del Rio Grande do Sul.

Varda, se sente sempre dir che la me gente italiana del Rio Grande do Sul la ze véneta, e tanti anca i dise che la gente italiana del Brasile la ze véneta. E te sè che ze vero, ma ze un vero come quel de ti e mi che gavemo i nostri fioi via pal mondo. Come noantri ghemo messo al mondo tanto pi fioi dei altri taliani, a ghemo el nostro sàngoe culturale, presente da par tuto, lora tuti i porta rento un s-ciantin che sia de sàngoe biològico véneto, e tuti, anca quei che no i ga sàngoe biològico véneto, i pol esser fradei atraverso el sàngoe culturale véneto. E questo el ze el nostro grande impegno: passar del sàngoe biològico véneto al sàngoe culturale véneto, parché, par salvar la nostra identità tel mondo globale, bisogna far tuta la gente partissipante del nostro sàngoe culturale, globalisare el nostro sàngoe culturale.

Sia biològica che culturalmente, bisogna che se metemo laorar come trivéneto-lombardi, e brasiliani de tute le etnie e italiani de tute le etnie anca che ghe ze in Itália, parché tuti i pol esser nostri gemei culturali.

Lora la nostra proposta, te sto primo punto la ze questa:

Meter in assion in Rio Grande do Sul e tel Véneto le scole, le cese, i impreditori, el comèrsio, la indùstria come se fusse la grande imigrassion del 1875, solo che desso la ze na imigrassion de ndar e vegner, de visitarse uno con l’altro, de far na vera invasion de un paese a l’altro par le persone far i primi contati. Lora ghe vol un progeto congiunto para saver modi de viagi marìtimi, aerei.. con finalità de laoro, de vìsite tra parenti, de dimore de pensionati che no ocor pi che i laore con le man, ma i pol laorar con la testa, come rissorsa culturale che i ze...

Bisogna che se parlemo con semplicitá, come i ga fato i nostri co i se ga messo far el Véneto del Mondo.

2º Tirar via dea testa che uno el ze meio de l’altro, e che’l Véneto el sarà diferente parché el ga indùstria, soldi, màchine..., parché tute le parte del mondo le podarà vegner un di a dir lo stesso.

Ma el Véneto el sará diferente, parché el ga na parola diferente, che traduse na vita diferente, ze la so parola stòrica, familiare, civile e religiosa che bisogna esser salva e riscatada. Semo eterni nò come véneti del indùstria, del comèrsio, de la arte, de la religion, mas come véneti de la parola.

Un pòpolo sensa parola el ze un pòpolo muto. E Dio no’l ze mai stà muto, el ga fato el mondo e tuto quanto atraverso la so eterna parola, e Gesù el se ga fato nostro fradel come eterna parola de Dio, e noantri saremo gemei atraverso la eterna parola véneta, che, atraverso el pupà e la mama, Dio el ga aceta liberamente a farne véneti nel mondo.

Sensa la lìngua, che bisogna esser messa in pié el quanto prima, tea region e tel mondo, el Véneto el sará un paese industriale, fursi un di el primo, dopo el secondo, dopo el terso e anca el ùltimo del mondo, definio par quel che’l ga e quael che’l fa, ma nò par quel che’l ze.

Ze urgente na maniera de scriver na lìngua ufissial che porte rento le diferente forme vénete in una grafia unitària, sinò restemo solo in ciàcole, e el provèrbio el dise che "aqua e ciàcole no fa frìtole."

Come Véneto del Rio Grande do Sul, ghemo sento e vinti sei ani, e ghemo sempre parlà el Véneto, parché gnanca uno per sento dei nostri fioi i è nati muti, e anca quei i se capisse con tuti atraverso moti e sesti véneti.

3º El Véneto del Rio Grande do Sul e el Véneto del Itàlia, insieme ai so fioi presenti in tuto el mondo i farà el Véneto del Mondo, con sàngoe Véneto atraverso i fioi dei du gemeli biològichi, e con sàngoe cultrale atraverso tuti i altri con i quali qualsiasi fiol dei gemeli biològichi el se fa presente.

Studiar el Rio Grande do Sul nel Véneto del Itàlia e studiar el Véneto del Itàlia nel Rio Grande do Sul, ze la grande sfida par far nasser na nova forma culturale, tel mondo globale.

E la polìtica, la religion, la indùstria, el comèrsio i vegnarà a capir che la sostansa de tuto ze el gemelaio culturale, parché el sàngoe culturale el va al de sopra del lìmite biològico, e tuti i podarà esser nostri gemei culturali. Lora esser véneto s-ceto, sia biològico che culturale, ze far véneto el mondo.

Porto Alegre, 18 giugno 2001, nàssita del Gemelaio tra Rio Grande do Sul, Brasile e Regione Véneto, Itàlia.

Professore Don Rovílio Costa.